နိုင်ငံတော်သမ္မတထောက်ခံပွဲသို့ အစ္စလာမ်ဘာသာဝင်များအား ဖိတ်ကြား

မင်းမင်းလတ်-မန္တလေး(မြစ်မခ)
by Myit Makha Mediagroup on 1 Sep, 2012

မန္တလေးမြို့တွင်ကျင်းပပြုလုပ်မည့် နိုင်ငံတော်သမ္မတကြီးအား ထောက်ခံပွဲ ပြုလုပ်ရခြင်းမှာ အစ္စလာမ်ဘာသာဝင်များကို ဆန့်ကျင်လို၍  မဟုတ်ကြောင်း သက်သေပြသည့်အနေဖြင့် မစိုးရိမ်တိုက်သစ်မှ ဆရာတော်ဝီရသူက အစ္စလာမ်ဘာသာဝင်များအား ပူးပေါင်းပါဝင်ရန် ဖိတ်ခေါ်လိုက်သည်။
စက်တင်ဘာ (၂)ရက်နေ့နှင့် (၃)ရက်နေ့များတွင် အောင်မြေသာစံမြို့နယ်၊မဟာအောင်မြေမြို့နယ်နှင့် ချမ်းအေးသာစံ မြို့နယ် များတွင် နိုင်ငံတော်သမ္မတအားထောက်ခံသည့် စီတန်းလမ်းလျှောက်ခွင့်ရရှိပြီးဖြစ်ကြောင်းကိုလည်း မြို့ခံများထံက  သိရသည်။

ရခိုင်ပြည်တွင်းသို့ ခိုးဝင်လာသည့် တစ်ဖက်နိုင်ငံမှ ရိုဟင်ဂျာအယောင်ဆောင်ထားသော အကြမ်းဖက်သည့် ဘင်္ဂလီများကို ဆန့်ကျင်ခြင်းသာဖြစ်ကြောင်း ဆရာတော်မှ မိန့်ကြားသည်။ 

``အစ္စလာမ်ဘာသာဝင်တွေက ဒီဆန့်ကျင်ပွဲမှာ ပူးပေါင်းပါဝင်လာမယ်ဆိုရင် ဦးဇင်းက သူတို့ကို လက်ကမ်းကြိုပြီး   နေရာပေးသွားမှာဖြစ်တယ်။ ပြည်တွင်းမှာရှိတဲ့ အစ္စလာမ်ဘာသာဝင်တွေရဲ့ လုံခြုံရေးကိုလည်း ဦးဇင်းအာမခံတယ်၊ အခြားဘာသာဝင်တွေကိုလည်း ဖိတ်ခေါ်ပါတယ် ´´ ဟု ဆရာတော်မှ မိန့်ကြားသည်။
အရှင်ဝီရသူသည် နိုင်ငံတော်မှ လွတ်ငြိမ်းချမ်းသာခွင့်ဖြင့် ပြန်လည်လွတ်မြောက်လာပြီးနောက်ပိုင်း ဘာသာပေါင်းစုံနှင့် ရင်းနှီးမှုတည်ဆောက်ရန် ကြိုးစားနေသည့် ဆရာတော် သံယာတော်တစ်ပါးဖြစ်သည်။

ဆရာတော်သည် ပြည်လည်လွတ်မြောက်လာပြီးနောက်ပိုင်း ဘာသာပေါင်းစုံငြိမ်းချမ်းရေးပွဲများ ကျင်းပလျှက်ရှိသည်။

"ဆရာတော်က ဘာသာပေါင်းစုံပွဲတွေလည်း လုပ်နေပါတယ်၊အခုလည်း ကျွန်တော်တို့ကို ဖိတ်ခေါ်တယ်ဆိုပေမယ့် မန္တလေးမှာရှိတဲ့ အစ္စလာမ်အများစု ဘာသာရေးနဲ့နွယ်နေလို့ ပွင့်ပွင့်လင်းလင်းပြောရရင် အစ္စလာမ်အများစုက လက်ရှောင်ချင်တဲ့ သဘောရှိတယ်"ဟု မန္တလေးမြို့မှ အစ္စလာမ်ဘာသာဝင်တစ်ဦးက ဆရာတော်၏ ဖိတ်ကြားမှုနှင့်ပတ်သက်၍ ၄င်း၏ အမြင်ကို ပြောသည်။