ရခိုင်ဒေသ ပဋိပက္ခများနှင့် ပတ်သတ်ပြီး ကိုကိုကြီး ပြောကြား

  ၈၈ မျိုးဆက်ကျောင်းသားများ အဖွဲ့အနေနဲ့ ရခိုင်ဒေသကို မသွားရောက်ခင်မှာ တတ်နိုင်သလောက် ရခိုင်သုတေသီတွေ  ထုတ်တဲ့ စာရွက်စာတမ်းတွေ၊ ရိုဟင်ဂျာတွေဘက်က ထုတ်တဲ့ စာရွက်စာတမ်းတွေကို တော်တော်များများ လေ့လာခဲ့ပါတယ်။ ကျနော်တို့ သွားတဲ့ ရည်ရွယ်ချက်ကိုယ်နှိုက်က ကျနော်တို့က အဖြစ်အပျက်အမှန်တွေကို သိရှိနိုင်ဖို့ပါ။ နောက်တခုက ကြီးတဲ့အမှုကို ငယ်အောင်၊ ငယ်တဲ့အမှုကို ပပျောက်အောင် ကျနော်တို့ ဘယ်လိုဆောင်ရွက်ပေးနိုင်မလဲ၊ အထူးသဖြင့် အမျိုးသားပြန်လည်သင့်မြတ်ရေးလို့ ပြောရင် ကျနော်တို့ တိုင်းရင်းသားတွေ အချင်းချင်းကြားထဲမှာ နားလည်မှုတွေနဲ့ ဘယ်လိုတည်ဆောက်မလဲ ဆိုတဲ့ ရည်ရွယ်ချက်တွေနဲ့ သွားခဲ့ပါတယ်။ ကျနော်တို့ မြန်မာလူမျိုးတွေ မြန်မာနိုင်ငံသားတွေဟာ ဒုက္ခရောက်နေသူတွေကို ကြောင်တောင်ကြည့်နေတဲ့ လူစားမျိုးတွေ မဟုတ်ပါဘူးလို့ ၈၈ မျိုးဆက်ကျောင်းသားခေါင်းဆောင် ကိုကိုကြီးက ဇူလိုင်လ ၅ ရက်နေ့က ၈၈ မျိုးဆက်ကျောင်းသားများရုံးမှာ ကျင်းပပြုလုပ်တဲ့ သတင်းစာရှင်းလင်းပွဲအတွင်း ထည့်သွင်း ပြောကြားခဲ့ပါတယ်။

ရခိုင်ဒေသ ပဋိပက္ခများနှင့် ပတ်သတ်ပြီး ကိုမင်းကိုနိုင် ပြောကြား

   မြန်မာတပြည်လုံးမှာ လူ့အခွင့်အရေးချိုးဖောက်မှုဟာ တနေရာတည်းမှာ ဖြစ်နေတာ မဟုတ်ပါဘူး၊ နေရာအနှံ့မှာ ဖြစ်နေတာပါ။ ဒါဟာ တရားဥပဒေစိုးမိုးမှု ကင်းမဲ့လို့ လူ့အခွင့်အရေး ချိုးဖောက်ခံရမှုဟာ တပြည်လုံးမှာ ရှိနေတာပါ။ ဒီကိစ္စမှာတော့ လူ့အခွင့်အရေးတည်း ဆိုတဲ့ ရှုထောင့်တခုတည်းက ကြည့်လို့ လုံးဝ မလုံလောက်ပါဘူး၊ ကျနော်တို့ တိုင်းပြည်ရဲ့ သမိုင်းကြောင်း၊ ကျနော်တို့ တမျိုးသားလုံးရဲ့ အကျိုးစီးပွားတွေ၊ ပြည်ပက ကျူးကျော်ဝင်ရောက်နေမှုတွေ၊ အဲ့ဒီမှာလဲ မတရားသဖြင့် ကျနော်တို့ဆီက အကျင့်ပျက်နေတဲ့ ၀န်ထမ်းတွေကြောင့် တချိန်တုန်းက ၀င်ရောက်လာမှုတွေ ရှိသလို၊ နည်းလမ်းပေါင်းစုံနဲ့ ၀င်ရောက်နေမှုတွေလဲ ရှိပါတယ်။ ဒါကြောင့် ကျနော်တို့ အမျိုးသား အကျိုးစီးပွားအတွက်ရယ်၊ နိုင်ငံသားတွေရဲ့ အခွင့်အရေးတွေရယ်၊ တိုင်းရင်းသားတွေရဲ့ အခွင့်အရေးတွေရယ် အားလုံးခြုံပြီး ကြည့်ရပါမယ်။ ပြဿနာက အင်မတန် သိမ်မွေ့ပါတယ်လို့ လက်ရှိဖြစ်ပွားနေတဲ့ ရခိုင်ဒေသတွင်း ပဋိပက္ခတွေနဲ့ ပတ်သတ်ပြီး ၈၈ မျိုးဆက် ကျောင်းသားခေါင်းဆောင် ကိုမင်းကိုနိုင်က သူ့ရဲ့သဘောထားကို အခုလို ပြောကြားလိုက်ပါတယ်။