စက်တင်ဘာ သံဃာလှုပ်ရှားမှုရဲ့ခေါင်းဆောင် အရှင်ဂမ္ဘီရကို ဖေဖော်ဝါရီလ ၁၀ ရက်နေ့ မနက် ၂ နာရီခန့်က သူ သီတင်းသုံးနေတဲ့ လယ်တီပဏ္ဍိတ ကျောင်းတိုက်ကနေ ရန်ကုန်တိုင်း ဒေသကြီး အစိုးရအဖွဲ့က ဆိုပြီး ကား ၃ စီး နဲ့ လာရောက် ဖမ်းဆီးသွားခဲ့ပြီးတဲ့နောက် ဘယ်နေရာကို ရောက်နေသလဲ ဆိုတာ မသိရသေးကြောင်း၊ ဖမ်းဆီးထားတယ် ဆိုတာကိုလည်း ဘယ်သူကမှ တာဝန်ယူ ပြောကြားခြင်း မရှိကြောင်း မိသားစုက ပြောပါတယ်။ ဒီအကြောင်းကို ထိုင်းအခြေစိုက် သတင်းထောက် မအေးအေးမာက တင်ပြထားပါတယ်။
မကြာသေးခင်ကမှ လွတ်ငြိမ်းချမ်းသာခွင့်နဲ့ ပြန်လွတ်လာတဲ့ အရှင်ဂမ္ဘီရကို အာဏာပိုင်တွေက သောကြာနေ့ မနက်အစောပိုင်းကပဲ ဖမ်းဆီးသွားခဲ့ကြောင်း၊ ဘယ်ကိုရောက်နေသလဲ ဆိုတာ မသိရကြောင်း အရှင်ဂမ္ဘီရ ရဲ့  အစ်မတော် မခင်သူဌေးက ပြောပါတယ်။
“အာဏာပိုင်တွေနောက်ကို လိုက်တာပါ။ ကိုအောင်ကျော်ကျော် နဲ့ ကျမ အမျိုးသား ကိုညီညီထွေး နဲ့လိုက်သွားတာလေ။ လိုက်သွားတော့ သူတို့က မနေ့ညက ရန်ကုန်တိုင်း ဒေသကြီး အစိုးရအဖွဲ့ရုံးလို့ ပြောတာကိုး။ အဲဒါနဲ့ အဲဒီကိုလိုက်တယ်။ ဟိုရောက်တော့ အုပ်ချုပ်ရေးမှူး မရှိပါ ဆိုတဲ့ စာကို ထောင်ထားတယ်။ အဲဒါနဲ့ အဲဒီက၀န်ထမ်းကို မေးတဲ့အခါကျတော့ သူတို့မလုပ်ပါဘူးလို့ ပြောတယ်။ သူတို့မလုပ်ဘဲနဲ့ တခြား လူမှုဌာနအဖွဲ့ကို လွှဲတယ်။ လူမှုဌာနအဖွဲ့ကို သွားမေးကြည့်တဲ့အခါကျတော့ သံဃာကိစ္စကိုကိုင်တဲ့ ဦးမောင်ဝင်း ဆိုတာနဲ့ တွေ့တယ်။ သူကလည်း သူတို့ မသိရပါဘူးလို့ပြောတယ်။ အဲဒါနဲ့ တခါ အောက်ထပ်က ရဲရုံးကို မေးကြည့်ပါဦးလို့ ပြောတယ်။ ရဲရုံးကိုသွားတော့လည်း ရဲရုံးကလည်း သူတို့ ပင့်ရတာ မဟုတ်ပါဘူးတဲ့။ တခါ ခလယ - နိုင် ကို သွားပြီးတော့ မေးခိုင်းတယ်။ အဲဒီကိုသွားပြန်တော့လည်း သူတို့လည်း ပင့်တာမဟုတ်ပါဘူးတဲ့။ အဲဒီလိုမျိုး ပြောလွှတ်လိုက်တယ်။ အခုတော့ ဘယ်မှာဆိုတာ မသိရသေးဘူး။”
မနေ့ညက ဖမ်းဆီးချိန်မှာ အတူရှိနေတဲ့ မဂ္ဂင်ကျောင်းက ဆရာတော် ဦးဣသရိယကလည်း အခုလို ပြောပါတယ်။
“ဥပဉ္ဇင်းနဲ့ ခြင်ထောင်ချင်း ဘေးချင်းယှဉ်ပြီးတော့ ကျိန်းနေတာပါ။ အဲဒီမှာ ၁ နာရီခွဲမှာ လူ ၁၁ ယောက်လောက် ကျောင်းပေါ်ကို တက်လာပါတယ်။ ဥပဉ္ဇင်းတို့ ယာယီသီတင်းသုံးနေတဲ့ လယ်တီ ၀ိပသနာ ကျောင်းတိုက်ပေါ်ကို တက်လာပါတယ်။ တက်လာပြီးတော့ ဦးဂမ္ဘီရနဲ့ တွေ့ချင်ပါတယ် ဆိုတော့ အဲဒီမှာ ဦးဂမ္ဘီရ ရဲ့ခြင်ထောင်ကို လက်ညှိုးထိုးပြတော့ ခြင်ထောင်ကို လာလှပ်ပါတယ်။ အဲဒီအချိန်မှာ ဥပဉ္ဇင်းကလည်း အိပ်ယာကနိုးနေတော့ သိပါတယ်။ သူတို့နဲ့ တခါတည်း လိုက်ခဲ့ဖို့ ပြောပါတယ်။ အားလုံးသော ၁၁ ယောက်လုံးက သာမန် အရပ်ဝတ်တွေကို ၀တ်ထားပါတယ်။ အဲဒါနဲ့ သူတို့ကို ဘယ်အဖွဲ့အစည်းကလဲ လို့မေးတော့ တိုင်း သာသနာရေး ဦးစီးကပါလို့ ပြောတယ်။ ပြောပြီးတော့ အဲဒီ ၂ နာရီမှာ အဲဒီကျောင်းတိုက်က ဆရာတော်ကြီးလည်းဖြစ်၊ မြို့နယ် သံဃာဥက္ကဋ္ဌ ဆရာတော်လည်းဖြစ်တဲ့ ဆရာတော်ကြီးဆီကို သွားလျှောက်ပြီးတော့ ဦးဂမ္ဘီရကို ပင့်သွားပါတယ်။ အဲဒီအချိန်မှာ ဥပဉ္ဇင်းက ၀န်းတံခါးဝအထိ လိုက်ပြီးတော့ ပို့ပါတယ်။ ပို့တဲ့အချိန်မှာ အနားမှာတွေ့တဲ့ ဒကာကြီးကို ဒကာကြီးတို့ရဲ့ အဖွဲ့အစည်းနံမည်ကို ပြောခဲ့ပါဦးလို့မေးတော့ တပည့်တော်တို့က ရန်ကုန်တိုင်း ဒေသကြီး အစိုးရအဖွဲ့ကပါ ဆိုပြီး ပြောသွားတယ်။ ကားသုံးစီးနဲ့ လာပါတယ်။ ကားနံပါတ်က ဥပဉ္ဇင်း မမှတ်မိဘူး။ စာရေးပြီးတော့ မှတ်ထားလိုက်တဲ့လူတော့ ရှိတယ်။ စူပါကက်စတန် ကားပေါ်မှာတင်ပြီးတော့ ခေါ်သွားပါတယ်။”
ဦးဂမ္ဘီရကို ဖမ်းဆီးထားသူတွေ အနေနဲ့ ၂၄ နာရီထက် ကျော်ပြီး ဖမ်းလို့မရကြောင်းတွေကိုလည်း ဦးဣသရိယက ပြောပါတယ်။
“ဖမ်းတာလည်း မသိရသေးပါဘူး။ ဘယ်သူက ဖမ်းတယ်လို့လည်း ဘယ်သူကမှလည်း တာဝန်ယူခြင်းလည်း မရှိပါဘူး။ ဥပဉ္ဇင်းတို့အနေနဲ့ကတော့ မနက် ၂ နာရီကနေ ဖမ်းသွားတယ် ဆိုတော့ နောက်နေ့ ၂ နာရီ ထိုးလို့ရှိရင်တော့ ၂၄ နာရီပြည့်ပါပြီ။ ၂၄ နာရီပြည့်ရင် လူတစ်ယောက်ကို အကြောင်းပြချက် မရှိဘဲ ၂၄ နာရီထက် ပိုပြီးမချုပ်ရပါဘူး။ အဲဒီ ၂၄ နာရီထက် ပိုပြီးတော့ ဖမ်းဆီး ချုပ်နှောင်မယ် ဆိုလို့ရှိရင် သူတို့ အမှုဖွင့်ရပါမယ်။ ဒါမှမဟုတ်ရင်လည်း တစ်ခုခု ဆောင်ရွက်တဲ့အကြောင်း ရမန်ယူတဲ့အကြောင်းကို ကာယကံရှင်တွေဆီကို သက်ဆိုင်ရာ ကျောင်းတိုက်တွေကို သူတို့ အကြောင်းကြားဖို့သင့်ပါတယ်။ အကြောင်းမကြားခဲ့ဘူး ဆိုရင်တော့ အခု ဖမ်းဆီးခေါ်ဆောင်သွားတဲ့ သူတွေဟာ ဖွဲ့စည်းအုပ်ချုပ်ပုံ အခြေခံဥပဒေကို ချိုးဖောက်တာ ဖြစ်တဲ့အတွက် သက်ဆိုင်ရာကို ဆက်လက်ပြီးတော့ အရေးယူ ဆောင်ရွက်ပေးဖို့ ဥပဉ္ဇင်းတို့ တိုက်တွန်းသွားပါမယ်လို့ ပြောကြားလိုပါတယ်။”
ဦးဂမ္ဘီရဟာ စက်တင်ဘာ သံဃာလှုပ်ရှားမှုကြီးမှာ ပါဝင်ခဲ့တာကြောင့် ဖမ်းဆီးခံခဲ့ရပြီး မကြာခင်ကမှ လွတ်ငြိမ်းချမ်းသာခွင့်နဲ့ ပြန်လည် လွတ်မြောက်လာတာ ဖြစ်ပါတယ်။